Um okkur

Poulsen ehf.

Ekki eru þau mörg íslensku fyrirtækin sem geta státað af því að hafa náð 100 ára aldri en eitt þeirra er verslunin Poulsen ehf. sem hélt upp á aldarafmæli sitt árið 2010. Reksturinn nær inn á mörg svið en frá upphafi hefur þungamiðja starfseminnar legið í innflutningi og sölu á varahlutum í bifreiðar og iðnvélar. Eftir sameiningu við fyrirtækið Orka – Snorri G. Guðmundsson hf. árið 2005 hefur bæst við umsvifamikið starfssvið rúðuísetninga, bílaréttinga og bílasprautunar. Hjá Poulsen ehf. starfa í dag um 30 manns.

Söguágrip

Poulsen ehf. er kennt við danska járnsteypumeistarann Valdimar Poulsen sem stofnaði fyrirtækið árið 1910. Hann kom hingað upphaflega til að starfa að uppbyggingu Járnsteypu Reykjavíkur en hóf einnig viðskipti með eldfastan leir og ýmsa málma. Árið 1926 opnaði Valdimar smásöluverslun að Klapparstíg 29 en þar var boðið upp á alls kyns vélar og varahluti ásamt ýmsum smíðaverkfærum. Nokkrum árum eftir andlát Valdimars árið 1946 kom Ingvar Kjartansson, kaupmaður, inn í reksturinn og keypti þar helmingshlut. Hann varð síðar forstjóri fyrirtækisins til margra ára og aðaleigandi þess frá árinu 1963 og til dauðadags árið 1990. Á öllum þessum tíma byggðist upp hið mikla og trausta orðspor sem átti leggja grunninn að þeirri löngu vegferð sem Poulsen ehf. státar af í dag. Ingvar Kjartansson var jafnframt mikill framkvæmdamaður og stóð t.d. að byggingu stórhýsis að Suðurlandsbraut 10. Þar fór starfsemi fyrirtækisins fram allar götu fram til ársins 2001.

Nýir eigendur

Frá árinu 2001 hefur Poulsen ehf. verið í eigu hluta af fjölskyldu Matthíasar Helgasonar og Elínar Ragnarsdóttur. Hún hafði þá rekið fyrirtækið Bílanaust í tæp 40 ár, en sú starfsemi hefur nú sameinast N1. Eftir eigendaskiptin fluttist reksturinn í núverandi húsnæði að Skeifunni 2 í Reykjavík en gólflötur þess er um 4000 fm. Fram til þess tíma höfðu baðinnréttingar verið fyrirferðamiklar en sá hluti var seldur út úr fyrirtækinu þar sem hann samrýmdist illa öðrum þáttum starfseminnar. Upp frá því hefur meiri kraftur verið lagður í byggja upp öfluga bifreiðaþjónustu og í því skyni hefur Poulsen ehf. keypt upp annan rekstur sem rær á svipuð mið. Óhætt er að segja að umfangsmesta fjárfestingin, að því leyti, hafi átt sér stað árið 2005 þegar gengið var frá kaupum á fyrirtækinu Orka-Snorri G. Guðmundsson (OSG). Með því bættust við um 20 starfsmenn ásamt nýjum starfsviðum t.d. innflutningi á Pilkington bílrúðum DuPont bílalökkum og 3M slípivörum ásamt fjölbreyttri flóru varahluta og verkfæra. Í beinu framhaldi keypti Poulsen síðan rekstur Framrúðunnar að Viðarhöfða 2 og með því bættist við nýr þjónustuliður bílrúðuísetninga. Meðfram öllu þessu hefur Poulsen ehf. einnig flutt inn og selt heita potta, spapotta og litlar sundlaugar, en sá þáttur er aðeins lítil hluti rekstrarins. Ísetningar og vörumóttaka fyrir bílrúður ásamt sýningarsal fyrir heita potta er með aðsetur að Grensásvegi 3.


Margþætt og sérhæfð þjónusta

Verslun Poulsen ehf. við Skeifuna 2 er líflegur staður, þar sem margþætt og sérhæfð þjónusturáðgjöf er veitt t.d. til bílaverkstæða, landbúnaðarins, útgerðar- og iðnfyrirtækja. Of langt mál væri að rekja alla þá þúsundir vöruflokka sem þar eru fyrirliggjandi en stærstur hluti þeirra þjónar því sameiginlega hlutverki að vera einhverskonar vara- eða slithlutur. Nákvæmar upplýsingar um hverja einstaka vöru eru jafnharðan keyrðar í gegnum afar fullkomið tölvukerfi sem sífellt er verið að uppfæra. Segja má að einstakt og víðfemt vöruvúrvalið hjá Poulsen hafi í raun mótast samkvæmt eftirspurn traustra viðskiptavina sem um ókomna tíð mun halda áfram að treysta undirstöðurnar í farsælum rekstri.